Gjermania ka thënë të premten se Ukraina mund t’i përdorë armët, me të cilat e furnizon Berlini, për t’i goditur caqet brenda territorit të Rusisë, por vetëm në afërsi të kufirit verior përreth qytetit Harkiv.
Gjermania ka biseduar me aleatët e vet për sulmet ruse në rajonin Harkiv të Ukrainës, të cilat ushtria ruse po i kryen nga pozicione brenda zonës kufitare ruse, tha një zëdhënës i Qeverisë gjermane.
“Ne jemi të bindur se Ukraina ka të drejtë, me ligj ndërkombëtar, për ta mbrojtur veten kundër këtyre sulmeve”, tha zëdhënësi në një komunikatë për media.
“Për ta bërë këtë, ajo mund t’i përdorë armët me të cilat furnizohet për këtë qëllim, në përputhje me detyrimet ligjore ndërkombëtare, përfshirë armët me të cilat e furnizojmë ne”, shtoi ai.
Qeveria e kancelarit Olaf Scholz kishte ngurruar t’i jepte leje Ukrainës për të kryer sulme brenda territorit të Rusisë.
Sekretari i Përgjithshëm i NATO-s, Jens Stoltenberg, e përsëriti të premten se aleatët duhet ta shqyrtojnë heqjen e kufizimeve për përdorimin e armëve të NATO-s nga Ukraina për t’i goditur caqet në territorin rus, sepse është pjesë e së drejtës së Kievit për vetëmbrojtje.
Vendimi i Berlinit vjen një ditë pasi presidenti i Shteteve të Bashkuara, Joe Biden, i dha dritën jeshile Kievit t’i përdorë armët amerikane për t’i goditur caqet brenda Rusisë, por vetëm në afri të kufirit me rajonin e Harkivit.
Në muajt e fundit, Rusia ka kryer sulme të pareshtura ajrore dhe tokësore kundër Ukrainës, e cila po përballet me mungesë municioni.
Kievi i është lutur aleatëve ta përshpejtojnë dërgimin e municionit, si dhe ka kërkuar që t’i lejohet të përdorë armë me rreze të gjata veprimi – pasi e ka të kufizuar përdorimin e tyre brenda territorit të Rusisë.
Harkivi, qyteti i dytë më i madh i Ukrainës, ndodhet vetëm 20 kilometra larg kufirit rus./rel
Meta njofton ndryshimet në mënyrën se si WhatsApp dhe Messen...
Irani “dërgon” qindra raketa balistike në Rusi
Ukraina e shqetësuar për praninë e raketave balistike irania...
Vogëlushi i afrohet Kurtit për ‘selfie’, ia vë gishtin në gj...
Fundjavë me fluks në Morinë, qytetarët e Kosovës për pushime...
Shqipëria me përmbysje spektakolare ndaj Ukrainës merr tri p...